حميات غذائية متوازنة متنوعة وصحية لتناسبك

لتكون سمبتيك تواصل معنا:

خرافات تغذوية Nutrition Myths""

 

ياما سمعنا قصص وخرافات، بقعدة الجارات، بلمة الصحاب، من التلفزيون أو المجلات ..

دير بالك تاكل بعد الساعة 6 بتنصح!  اااخ من وجبة العشا دمرتني، لولاها كان أنا سمبتيك!

خذ مني إذا ما قطعت خبز ورز عمرك ما رح تنحف! المنتجات الخالية من الجلوتين أفضل لصحتك! لازم تاخذ مكملات غذائية لحتى تضلك صحي وأمورك تمام! دير بالك تطنش وجبة الفطور هاي أهم وجبة! إضرابات الطعام تؤثر على النساء فقط! اشرب ليمون مع كاسة مي دافيه ع الريق بتمسح كرشك!!  وغيرها كثييييير

صار لازم تعرف الحقيقة العلمية لكل الخرافات الي بتدور حوالينا، بتكون قاعد بأمان الله بتتصفح بالسوشال ميديا ولا هي طالعيتلك خلطة تنحيف (إنحف 10 كيلو ب 10 أيام) يعني لو تقضيها تشرب مي وعايش ع الطاقة الشمسية ما رح تنحف 10 كيلو، خلطة أم النور لإزالة الكرش في أسبوع، وبرنامج الرابح الأكبر، وجروب لو نفسك تخس !! ئي وبعدين مع هالسولافه ...

من منبر سمبتيك رح نعطيكم حقائق علمية من مراجع علمية موثوقة لحتى تكونو مطمأنين من مصدر المعلومة ونصحح مفاهيم كثيرة بتتعلق بالتغذية؛ لحتى ما ينضحك علينا بسهولة ونضل مثقفين ومتعلمين.

 

الخرافة: تناول الطعام بعد ساعة معينة يؤدي إلى زيادة الوزن.

الحقيقة: المهم كمية الأكل الي بتتناوله يعني (مقدار السعرات الحرارية باليوم)، ومقدار النشاط البدني الي بتمارسه.

 أما بالنسبة لوقت الطعام، فمعدتك ما بتخزن الأكل بعد الساعة 6 والي قبل هيك بتهضمه!!!

 يعني وجبة العشا مش السبب بنصاحتك إذا أنت بتحسب سعرات الي بتاكلها بأكلك صح، لكن أكيد من ناحية صحية الأفضل تكون الوجبة الي بتسبق النوم خفيفة ولطيفة عشان ما تزعجك بالنومة أو تعملك مشاكل بالهضم مثل:عسر الهضم والإرتداد المريئي.

 

الخرافة: لازم تقطع خبز ورز (كربوهيدرات) لحتى تنحف.

الحقيقة: الكربوهيدرات مصدر مهم للطاقة وجزء مهم من نظامنا الغذائي، بس في نوعين من الكربوهيدرات "البسيطة، والمعقدة"، توجد الكربوهيدرات البسيطة في الأطعمة غير المغذية بشكل عام مثل: الشيبس، والمشروبات الغازية، والحلويات. أما الكربوهيدرات المعقدة أكثر كثافة بالعناصر الغذائية وتوجد في مصادر صحية مثل: الفواكه، والخضروات، والحبوب الكاملة، والمكسرات، والفول، بالنسبة للخبز والرز أنت إذا قطعتهم فعلياَ رح تنحف. لأنك قللت من كمية السعرات الحرارية المتناولة خلال اليوم، مش لأنه الرز والخبز همه السبب بسمنتك! افراطك بالأكل وبذات من الأطعمة الغنية بالسعرات بشكل يفوق حاجتك هو السبب الحقيقي.

   والسؤال المهم، كم رح تقدر تستمر على هذا النظام!  فطورنا كله تغميس بخبز والغدا لازم يكون فيه رز. فهو مش حل سحري ولا حل بتقدر تستمر عليه. لهيك خلي عينك على عدد سعراتك باليوم ومارس الأنشطة الرياضية بشكل يومي.

 

 

الخرافة: الدهون مضرة لصحتك.

الحقيقة: أغلب الناس بفكروا الدهون جزء مو مهم وصفر ع الشمال، وما بعرفو فوائده وأهميته في حصولك على الطاقة، وامتصاص الفيتامينات، وصحة الجسم، والوظائف الهرمونية وغيرها. بس في عنا دهون صحيّة أكثر من غيرها مثلا: زيت الزيتون، والأفوكادو، واللوز، والأسماك، صحيَة أكثر من الدهون الموجودة في اللحوم الحمراء، وجلد الدجاج، والزبدة. فأنت كشخص لازم أحكيلك أنه ما بتقدر تستغني عن مجموعة الدهون بشكلها الكامل، لكن مو غلط تقلل منها وتحاول تركز على الصحي منها أكثر.

 

 

الخرافة: الأطعمة الخالية من الغلوتين صحية أكثر من الأطعمة التي تحتوي على الغلوتين.

الحقيقة: إذا كنت شخص سليم لا تعاني من إضرابات هضمية أو عندك حساسية للغلوتين، فالأطعمة الخالية من الغلوتين مش صحية بالنسبة الك أكثر من غيرها، لأنك من خلال تناولك لهذه الأطعمة وأنت ما عندك أي مشاكل رح تخسر ألياف، وفيتامينات، ومعادن، وأنت بغنى نقص هذه العناصر وخسارة أهميتها لصحتك. في ألف طريقة تنزل فيها وزن وتتناول فيها أكل صحي بعيد عن هذه الأطعمة المعدّة حتى تناسب حالات مرضيه مستعصي عليها تناول طعامك المعتاد.

 

 

الخرافة: الملح بدمِّر الصحة.

الحقيقة: الاستهلاك الفائض من الصوديوم يمكن أن يؤدي إلى ارتفاع ضغط الدم ومشاكل بالكلى وبالتالي تدمير الصحة، لكن الملح (الصوديوم)، هو معدن ضروري للعديد من وظائف الجسم. منها المساعدة على توازن الماء في الجسم، وهو ضروري للعضلات والأعصاب، بما في ذلك القلب والدماغ.

 

 

 

 

 

الخرافة: المكملات الغذائية ضرورية لصحة أفضل.

الحقيقة: الأحسن والأفضل أنك تتناول غذاء صحي ومتوازن، بالتالي أنت هيك رح تغطي جميع الفيتامينات والعناصر الغذائية، خلي نظامك غني بالخضراوات، والفواكه، والحبوب الكاملة، والبروتينات، أما بحالة عندك نقص بأحد الفيتامينات أو العناصر الغذائية، راجع الطبيب لحتى يوصفلك المكمل الغذائي المناسب لحالتك.

 

 

الخرافة: المنتجات والمكملات المستخدمة لإنقاص الوزن المصنفة طبيعية "natural" هي آمنة وفعالة.

الحقيقة: بالبداية تذكر أنه ما في حل سريع لنزول الوزن، خلي ببالك فكرة الي بروح بسرعة برجع بسرعة، لهيك مو أي منتج بكون كاتبين عليه طبيعي هو فعلياَ طبيعي وآمن !! حتى الأعشاب وغيرها، كل هذي المنتجات ممكن ما تحقق من خلالها ربع طموحك أو الوزن الي بدك توصله وممكن يكون الها أضرار أكثر من فوائدها لهيك، أنت دايما حاول تكون متابع للعِلم والأبحاث وتبحث عن أي منتج من مصدر علمي موثوق لحتى تتأكد من فعاليته ونسبة الآمان فيه.

 

الخرافة: لازم نتناول وجبة الفطور لحياة صحيّة أفضل.

الحقيقة: وجبة الإفطار ممكن تتناولها وممكن تتخطاها، فإذا كنت من الأشخاص الي ما بتحب تفطر الصبح، مو ضروري تجبر حالك، مثلا ً في أنواع من نظام الصيام المتقطع ما بكون فيها وجبة الفطور وأثبتت جدارتها بتحسين نسبة السكر بالدم، ونزول الوزن وغيرها من الفوائد.

 

الخرافة: المي الدافية مع عصرة ليمون على الريق بتخليك تخسر وزن.

الحقيقة: إذا كنت من الأشخاص الي بتتناول فيها المي مع الليمون بدل من كاسة الشاي بسكر، أو العصير، أو النسكافيه أو أي مشروب فيه سعرات حرارية، أنت فعليا رح تنحف لأنك استبدلت المشروبات الي فيها سعرات حرارية بالليمون والماء الي ما فيه سعرات أصلاً، أما الليمون لوحده ليس حارق سحري ولا رح ينحفك لحاله ... يد واحده لا تصفق.

 

الخرافة: إضرابات الطعام تؤثر على النساء فقط.

الحقيقة: إضرابات الطعام وغيرها من المشاكل المتعلقة بالطعام ممكن تأثر على الجنسين الذكور والإناث، والأطفال والمراهقين والبالغين، وأشارت الدراسات أن 30% من الذكور المراهقين في الولايات المتحدة، أثبتوا عدم الرضا عن شكل أجسامهم، واستخدامهم لأساليب غير صحية ومنطقية للوصول إلى الجسم المثالي.

 

الخرافة: تناول مكملات الألياف"Fiber supplements" بدلاً من تناول الطعام الغني بالألياف.

الحقيقة: في كثير من الأشخاص استخدموا مكملات الألياف بدلاَ من تناول الخضراوات، والفواكه، والحبوب الكاملة، لأنهم واجهوا صعوبة في أخذ احتياجاتهم من الألياف، مكملات الألياف رح تساعدك من حيث تحسين صحة الأمعاء، والتحكم بنسبة السكر بالدم، لكن ما بتقدر تستغني عن الجزء الأهم الي هو الخضراوات والفواكه والحبوب الكاملة، حتى ما يصير عندك نقص بالفيتامينات والعناصر الغذائية.

 

 

الخرافة: مكملات الكالسيوم" Calcium supplements" ضرورية لصحة العظام.

الحقيقة: كثير من الناس بنصحوك بتناول الكالسيوم كمكمل غذائي حتى تحافظ على صحة عظامك، خصوصاً لما تكبر بالعمر وتبلش عندك أوجاع وهشاشة العظام، لكن أثبتت الدراسات أنه هذي المكملات ممكن تضر أكثر مما تنفع، فمثلاً ممكن تزيد عندك خطر الإصابة بأمراض القلب، وغيرها، فمن الأفضل نضل بالطريق السليم ونتناول الكالسيوم من مصادره الطبيعية مثل: الزبادي كامل الدسم، والفاصوليا، والسردين.

 

 

الخرافة: الريجيم القاسي " المنخفض بالسعرات الحرارية" حل سريع لنزول الوزن.

الحقيقة: عند اتباعك للحميات القاسية التي بتوصل فيها ل 800 و 1000 سعرة حراري باليوم أنت فعلياً رح تنحف، بس رح تنحف بطريقة خطأ، فهذي الأنواع من الحميات رح تعمل عندك تكيفات أيضية وعواقب صحية طويلة المدى أنت بغنى عنها، مثل: انخفاض معدل الأيض، وتغيرات في هرمونات الجوع والشبع، لهيك بتشوف أغلب الناس الي بخسوا بسرعة صعب يحافظوا على وزنهم على المدى البعيد.

 

المراجع:

1. https://www.csuohio.edu/recreationcenter/7-popular-myths-about-nutrition

2. https://www.healthline.com/nutrition/biggest-lies-of-nutrition

 

 

 

 

 

 

الرجوع الى الصفحة الرئيسية